BMT Bosh Assambleyasining 79-sessiyasi doirasida Markaziy Osiyo va AQSh tashqi ishlar vazirlarining "C5+1" formatidagi yig‘ilishi bo‘lib o‘tdi

2024-yil 27-sentabr kuni Nyu-York shahrida BMT Bosh Assambleyasining 79-yillik sessiyasi doirasida "С5+1" mintaqaviy diplomatik platformasi shafeligida O‘zbekiston Respublikasi, Qozog‘iston Respublikasi, Qirg‘iz Respublikasi, Tojikiston Respublikasi va Turkmaniston tashqi ishlar vazirlari hamda AQSh davlat kotibi o‘rtasida uchrashuv bo‘lib o‘tdi.

O‘zbekiston tashqi ishlar vaziri iqtisodiy hamkorlikni kengaytirish, barqaror rivojlanishni qo‘llab-quvvatlash, transport-logistika o‘zaro bog‘liqligini mustahkamlash, mintaqada tinchlik va farovonlikka ko‘maklashish borasidagi sa’y-harakatlarning ahamiyatini ta’kidladi. Ekologik o‘zgarishlar oqibatlarini yumshatish bo‘yicha birgalikdagi sa’y-harakatlarga alohida e’tibor qaratdi.

AQSh Davlat kotibi E.Blinken 2023-yil 19-sentabrda bo‘lib o‘tgan “C5+1” davlat rahbarlarining birinchi sammiti yakunlari bo‘yicha erishilgan kelishuvlarni, shuningdek, Nyu-York deklaratsiyasini samarali amalga oshirishga sodiqligini bildirib, mineral resurslar bo‘yicha "C5+1" muloqotining; AQSh va Markaziy Osiyo biznes hamkorligini qo‘llab-quvvatlash bo‘yicha birinchi "B5+1" forumi va nogironlik huquqlari bo‘yicha "C5+1" maxsus sessiyasi o‘tkazilayotganlini olqishladi.

Ishtirokchilar terrorizm, ekstremizm, narkotrafik, transmilliy va kiberjinoyatchilikka qarshi kurashish hamda radikallashuvga qarshi kurashish bo‘yicha birgalikdagi sa’y-harakatlarni yanada faollashtirish va muvofiqlashtirish zarurligiga kelishib oldilar.

2025 yilda ishtirokchi mamlakatlar "C5+1" formati doirasidagi muvaffaqiyatli hamkorlikning o‘n yilligini nishonlaydilar. Shu munosabat bilan  tomonlar mintaqa mamlakatlari va AQShning global masalalarga mintaqaviy yechimlarni izlashni davom ettirish, shuningdek, "C5+1" diplomatik platformasi doirasida hamkorlikni chuqurlashtirish istagini olqishladilar.