O‘zbekiston Respublikasi Prezidenti va Fransiya Respublikasi Prezidentining qo‘shma bayonoti
O‘zbekiston Respublikasi Prezidentining 2022-yil 21-22-noyabr kunlari Fransiyaga amalga oshirgan rasmiy tashrifi munosabati bilan, Fransiya Respublikasi Prezidenti va O‘zbekiston Respublikasi Prezidenti ikki mamlakat o‘rtasidagi yuksak darajadagi global (keng qamrovli) sheriklikni rivojlantirishni qo‘llab-quvvatlash maqsadida ushbu Qo‘shma bayonotni qabul qildilar.
Ikki tomonlama siyosiy munosabatlar
1. O‘zbekiston va Fransiya o‘rtasidagi diplomatik munosabatlar o‘rnatilganiga 30 yil to‘lgan joriy yilda prezidentlar ikki tomonlama munosabatlarning so‘nggi yillardagi sezilarli rivojlanishini mamnuniyat bilan qayd etdilar. Davlat rahbarlari ushbu ikki tomonlama sheriklikni chuqurlashtirishga hissa qo‘shish uchun O‘zbekiston tomonidan boshlangan mamlakatni modernizatsiya qilish bo‘yicha islohotlar hamda Markaziy Osiyoda yaxshi qo‘shnichilik munosabatlarini rivojlantirish yo‘lida olib borilayotgan sa’y-harakatlar yuzaga chiqargan ijobiy istiqbollarga urg‘u berdilar.
2. Tashrif davomida Tomonlar ta’lim, ilm-fan, madaniy meros, fuqaro aviatsiyasi, davlat xizmati va korrupsiyaga qarshi kurash bo‘yicha hamkorlik yuzasidan o‘ndan ortiq kelishuvlarni imzoladilar. Tomonlar turli darajalarda, zarur holatlarda, tegishli vazirliklarni jalb qilgan holda, o‘zaro manfaatli masalalar yuzasidan, xususan, xavfsizlik va iqtisodiy yo‘nalishlar bo‘yicha siyosiy maslahatlashuvlar o‘tkazishga tayyor ekanliklarini bildirdilar.
Shuningdek, Tomonlar parlamentlararo hamkorlikni rivojlantirish va ikki mamlakatdagi do‘stlik guruhlarining faoliyatini jadallashtirishdan manfaatdor ekanligini qayd etdilar.
3. Madaniy sohada Tomonlar 2022-yilning 22-noyabr kuni ochilgan Luvr muzeyidagi “O‘zbekiston vohalarining mo‘jizalari” va Arab dunyosi institutidagi “Samarqandga yo‘l, ipak va oltin mo‘’jizalari” ko‘rgazmalarining o‘tkazilishini mamnuniyat bilan qayd etdilar. Tomonlar madaniyat va madaniy meros sohalarida hamkorlikni kuchaytirish istaklarini bildirdilar hamda 2021-yil 6-yanvarda imzolangan Ahdlashuv deklaratsiyasiga muvofiq Toshkent shahrida Fransiya-O‘zbekiston madaniyat markazini tashkil etish bo‘yicha ishlarni davom ettiradilar.
4. Ta’lim sohasida Tomonlar ta’lim muassasalari o‘rtasidagi munosabatlarni yanada kuchaytirish, shuningdek, fransuz tilini o‘qitish va o‘qituvchilarni tayyorlashni takomillashtirish orqali hamkorlikni yanada rivojlantirishga kelishib oldilar.
Tomonlar Toshkent shahridagi Fransuz litseyi faoliyatini mamnuniyat bilan qayd etdilar, ushbu ta’lim muassasasining maqomini saqlab qolish va faoliyatiga ko‘maklashish istagini bildirdilar, shuningdek, Tomonlar Samarqand shahrida yangi Fransuz alyansining ochilishini soddalashtirishni taklif qildilar. Tomonlar Parij shahrida 2022-yil 27–28-noyabr kunlari bo‘lib o‘tadigan ikkinchi O‘zbekiston va Fransiya universitetlari forumi tashkil etilishidan mamnun ekanliklarini bildirdilar.
Ikki tomonlama iqtisodiy munosabatlar
5. Iqtisodiy yo‘nalish bo‘yicha Tomonlar O‘zbekiston va Fransiya o‘rtasidagi iqtisodiy hamkorlik yuzasidan 2020-2030-yillarga mo‘ljallangan Yo‘l xaritasida qayd etilgan sohalar bo‘yicha hamkorlikni rivojlantirishga kelishib oldilar.
Tashrif davomida energetika, suv ta’minotini boshqarish, transport va turizm sohalarida juda ko‘p iqtisodiy shartnomalar imzolandi. Qishloq xo‘jaligi sohasidagi harakatlar rejasi kelgusi hamkorlik yo‘nalishlarini o‘rganishga imkon beradi. O‘zbek tomoni fransiyalik investorlarning mamlakatga kirishini yengillashtirish uchun zarur yordamni ta’minlashga hamda mavjud tartiblarni soddalashtirishga tayyor ekanini bildirdi.
6. Ikki davlat rahbarlari Fransiya taraqqiyot agentligining faoliyatini ijobiy baholadilar va O‘zbekistonning davlat investitsiyalarini qo‘llab-quvvatlash uchun 2022-2025-yillarga mo‘ljallangan strategik sheriklik to‘g‘risidagi Bitim imzolanganini mamnuniyat bilan qayd etdilar. Xususan, ular Agentlik yashil iqtisodiyot yo‘nalishida boshlangan hamkorlikni davom ettirishi hamda Orol dengizi hududini rivojlantirish bo‘yicha loyihalarni amalga oshirishi yuzasidan istaklari yakdilligini bildirdilar.
7. Tomonlar turizm sohasida, xususan, turistik hududlar salohiyatini ishga solish bo‘yicha hamkorlikni yanada rivojlantirishga kelishib oldilar. Fransiya tomoni O‘zbekistonning 2023-yilda Xiva shahrida “Yevropa Ittifoqi – Markaziy Osiyo” birinchi turistik forumini o‘tkazish bo‘yicha taklifini qo‘llab-quvvatladi.
Mintaqaviy va xalqaro siyosat
8. O‘zbekiston va Fransiya dunyoda va mintaqaviy darajada xavfsizlik, tinchlik va barqarorlikni mustahkamlashga hissa qo‘shish istaklarini tasdiqladilar. Ikkala Tomon Birlashgan Millatlar Tashkiloti, Yevropada xavfsizlik va hamkorlik tashkiloti, boshqa xalqaro tashkilotlar va tegishli mintaqaviy tuzilmalar doirasida o‘z harakatlarini muvofiqlashtirishni kuchaytirishga tayyor ekanliklarini bildirdilar. Tomonlar nizolarni muzokaralar orqali, xalqaro huquq va Birlashgan Millatlar Tashkiloti Ustaviga to‘liq amal qilgan holda hal qilish bo‘yicha qat’iyatlarini qayta tasdiqladilar.
9. Tomonlar O‘zbekiston Respublikasi va Yevropa Ittifoqi o‘rtasidagi munosabatlarning rivojini mamnuniyat bilan qayd etdilar. Ular Yevropa Ittifoqining “Global darvoza” strategiyasi va Samarqand shahrida 2022-yil 17-18-noyabr kunlari bo‘lib o‘tgan Yevropa Ittifoqi – Markaziy Osiyo o‘zaro bog‘liqligi konferensiyasi doirasida mintaqalararo hamkorlikni rivojlantirishni qo‘llab-quvvatladilar.
Tomonlar O‘zbekiston Respublikasi va Yevropa Ittifoqi o‘rtasidagi munosabatlarni yanada kuchaytirishga imkon beradigan, 2022-yilning iyul oyida matni kelishilgan O‘zbekiston Respublikasi va Yevropa Ittifoqi o‘rtasidagi Kengaytirilgan sheriklik va hamkorlik to‘g‘risidagi Bitim bo‘yicha muzokaralar yakunlanganini mamnuniyat bilan qayd etdilar.
10. Tomonlar Afg‘onistondagi vaziyatni barqarorlashtirish va mintaqadagi xavfsizlikni ta’minlashga hissa qo‘shishdan manfaatdor ekanini bildirdilar, 2022-yil 26-iyulda Toshkent shahrida bo‘lib o‘tgan Afg‘oniston bo‘yicha xalqaro konferensiyada Fransiya tomonining ishtirok etgani buni yaqqol tasdiqlaydi.
