AQSh Davlat kotibi bilan telefon orqali muloqot to‘g‘risida

2021-yilning 22-aprel kuni O‘zbekiston Respublikasi Tashqi ishlar vaziri Abdulaziz Kamilov Amerika Qo‘shma Shtatlari Davlat kotibi Entoni Blinken bilan telefon orqali muloqot qildi.

Suhbat chog‘ida ko‘p qirrali O‘zbekiston-Amerika strategik sherikligining hozirgi holati va uni yanada chuqurlashtirishning istiqbollari muhokama qilindi.

AQSh tomoni O‘zbekistonda amalga oshirilayotgan demokratik o‘zgarishlarga yuqori baho berdi. Jumladan, odam savdosiga qarshi kurashish va e’tiqod erkinligini ta’minlash sohasida erishilgan yutuqlar e’tirof etildi.

Tomonlar “C5+1” shakli doirasidagi faol hamkorlikni davom ettirishning muhimligi qayd etildi.

Afg‘onistonda mojarodan keyingi davrda ijtimoiy-iqtisodiy hayotni qayta tiklash uchun mamlakatni mintaqaviy integratsiya jarayonlariga jalb qilish masalalariga alohida e’tibor qaratildi.

O‘zbekiston TIV rahbari AQSh Davlat kotibini joriy yil iyul oyida Toshkent shahrida o‘tkaziladigan “Markaziy va Janubiy Osiyo: mintaqaviy bogʻliqlik. Tahdidlar va imkoniyatlar” mavzusidagi yuqori darajali xalqaro konferensiyaga taklif qildi.